20 ақп, 2020 сағат 09:38

Ұлттық банк 2000 теңгелік ақша туралы мәлімдеме жасады

Қазақстан Республикасының Ұлттық банкі номиналы 2000 теңгелік банкноттар туралы мәлімдеме жасады, деп хабарлайды "Ұлт ақпарат".

Қазіргі уақытта Ұлттық банк төрағасының қолтаңбасы қойылған, сол сияқты қолтаңбасы қойылмаған номиналы 2000 теңгелік банкноттар айналымда жүр. Азаматтар қайсы жалған екенін білмей әлек болды.

"Қазақстан Республикасының Ұлттық банкі ұлттық валюта – теңге банкноттары мен монеталары дизайнының тұжырымдамасына сәйкес, Ұлттық банк төрағасының теңге банкноттарында қолтаңбасының қойылуы туралы талаптың 2016 жылдан бастап алып тасталғанын еске салады. Қазіргі уақытта айналымда Ұлттық банк төрағасының қолтаңбасы қойылған, сол сияқты қолтаңбасы қойылмаған 2012 жылғы үлгідегі номиналы 2000 теңгелік банкноттар бар", - делінген ақпаратта.

Бұл банкноттар заңды төлем құралы саналады және төлемнің барлық түрі бойынша қабылдануға міндетті, деп атап өтті Ұлттық банк.