05 қаз, 2018 сағат 18:08

Түркістандықтар Елбасы Жолдауынан үлкен серпіліс күтеді

Түркістан облысының тұрғындары Елбасы Нұрсұлтан Назарбаевтың Жолдауы халықтың әлеуметтік жағдайын жақсартуға бағытталған деп қабылдады.

Облыстың құрметті азаматы,  халықаралық «Алаш» әдеби сыйлығының иегері Рахым Балабиев Жолдаудың «Қазақстандықтардың әл-ауқатының өсуі: Табыс пен тұрмыс сапасын арттыру» деп аталуының өзі мемлекеттің осы бағыттан танбағанын көрсетеді деп отыр.

«Ұлт көшбасшысы бұл жолы халықтың тұрмысын сапалық тұрғыда мүлде жаңа деңгейге көтеретін тамаша бастамалар көтерді. Бір ғана ауыз су және жергілікті жерлерге қатысты тапсырмасына ой жүгіртіп көріңізші. Бұл жөнінде Н.Назарбаев «2015 жылдан бастап, 3 жылда республика бойынша 2 400 шақырым автожол салынды және жөндеуден өткізілді. Бұл жұмыстар жалғасады және 2020 жылға дейін қосымша тағы 4 600 шақырым жол салынады және жөнделеді» дейді. Сондықтан, Жолдауда қамтылған мәселелер қарапайым қазақстандықтардың өмірін жақсарта түсетін шешімдер екені даусыз», - дейді Қазақстан Жазушылар Одағының мүшесі.

Президенттің тапсырмасына сәйкес, жергілікті жолдардың құрылысына бөлінетін қаржының көлемі 150 млрд теңгеге, ал, ауылды жерлерде халықты таза сумен қамтуға қарастырылған қаражат 100 млрд теңгеге ұлғаяды.

«Елдегі азаматтардың тұрмысы жақсарған сайын оның ертеңгі күнге деген сенімі арта түседі. Халықтың сенімі мен бірлігі бекем болса, Елбасы айтқандай, Қазақстанның бағындырар биіктері әлі алда», - дейді халықаралық «Алаш» әдеби сыйлығының иегері.