30 қар, 2018 сағат 11:45

Түркістанда Қожа Ахмет Ясауи музейі салынады

Түркістан облысында «Рухани жаңғыру» бағдарламасын іске асыру аясында тың жобалар қолға алынбақ. Бұл туралы 29 қараш күні ҚР Президенті Әкімшілігінің жетекшісі Әсет Исекешевтің төрағалығымен өткен селекторлық жиында өңір басшысы Жансейіт Түймебаев айтты, деп хабарлайды "Ұлт ақпарат".

Түркістан облысының әкімі Елбасының мақаласында айтылған міндеттерді орындауға байланысты өңірде атқарылған жұмыстарды баяндап, алдағы уақытта іске асырылатын жобалармен таныстырды.


«Мемлекет басшысының «Ұлы Даланың жеті қыры» атты тарихи мақаласы ел санасына қозғау салған, «Мәңгілік ел» болу жолындағы ұлы міндеттерді айқындап берген, «Болашаққа бағдар: рухани жаңғыру» бағдарламалық мақаласының жалғасы, әрі елді биік мақсаттарға жетелейтін маңызды құжат. Осы құнды бағдарламадағы тапсырмаларды орындау мақсатында Түркістан облысында бірқатар жұмыстар қолға алынып, қарқынды жүзеге асырылуда. Мәселен, атбегілікті, аңшылықты, салт-дәстүрді насихаттау мақсатында облыста арнайы фестивальдер ұйымдастырылуда. Сондай-ақ, «Қызыл кітапқа» енген, яғни айрықша қорғауды қажет ететін қызғалдақ гүлін қорғау және сол аймақтың туристік әлеуетін көтеру мақсатында халықаралық «Қызғалдақ» шарасы қолға алынды. Елбасының айтулы мақаласының «Түркі әлемінің бесігі» деп аталатын бөлімінде Түркістан қаласында туған Ясауи бабамыз бен Отырардан түлеп ұшқан әл-Фараби ғұлама туралы да айтылды. Бұл бағытта да тарихи тұлғалар мен көне қалаларды насихаттау үшін анимациялық фильмдер мен телехикаялар түсірілді. Алдағы уақытта қоғамдық сананы жаңғырту бағдарламасын жүзеге асыру бағытында жаңаша жобаларды қолға алуды жоспарлап отырмыз», - деді Жансейіт Түймебаев.


Сондай-ақ, облыс әкімі 2019 жылы Түркістан облысында «Сәйгүліктер» фестивалі ұйымдастырылатынын айтты. Ұлттық кодты жаңғырту мақсатында өткізілетін шара аясында ат спорт ойындары: теңге ілу, аударыспақ, қыз қуу, жамбы ату, сәйгүліктер шеруі өтеді. Сондай-ақ ат әбзелдері, аттылы жауынгерлердің киімі мен қару-жарақтарына арналған көрмелер, жылқы малына байланысты жыр мүшәйрасы, жыршылар мен термешілер байқауын ұйымдастыру көзделген. Сонымен қатар, «Шығыс базары» атты фестиваль өткізу жоспарланған. Ондағы мақсат қола, мыс, темір, күміс, алтыннан жасалған әшекей бұйымдардың, тұрмыстық заттар мен қару-жарақтардың жәрмеңкесін өткізу арқылы қазақ жері - металлургия пайда болған алғашқы орталықтың бірі екенін паш ету.

Одан бөлек, Қожа Ахмет Ясауидің тарихи болмысын жаһанға өз деңгейінде толық танытып, насихаттау мақсатында бірқатар шаруалар атқарылмақ. Атап айтқанда, Елбасы тапсырмасы бойынша, жаңа Түркістанда Ясауи музейі салынбақ. Бұл мұражайда ғұлама мен оның шет мемлекеттердегі шәкірттерінің еңбектері қойылады. Яғни, Ясауи феноменін жоғарылатып, атын асқақтату арқылы ғылымды ғана емес, туризмді де дамыту мүмкіндігі ашыла түседі. Сондай-ақ, Түркістан қаласында әлемнің түкпір-түкпірінде Ясауи бабаның ғылыми мұрасын зерттеп жүрген ясауитанушылардың басын қосып, халықаралық конференция өткізу межеленген. Ясауи мұралары кешенді түрде зерттеліп, деректі және көркем фильмдер түсіріледі.