11 қаң, 2017 сағат 20:21

ШҚО тұрғыны жүз шаршылы шахматтың жаңа түрін ойлап тапты

ШҚО тұрғыны Александр Кочернин жүз шаршылы шахматтың классикалық түрін ойлап тапты. Өзінің жаңа туындысына қазақстандық патент алып үлгерген шахматшы қазірде жас жеткіншектерді жүз шаршылы шахматқа баулуда.

Жүз шаршылы шахматтың қазіргі күнде әлемге 28 түрі белгілі. Дегенмен Александр Кочерниннің айтуынша, ешқайсысы табиғат заңдылығына сай келмейді.

– Классикалық 64 шаршылы немесе өзге 100 шаршылы шахматтың қай-қайсысы патшаға «мат» қоюдан аяқталады. Бірақ, мен ұсынып отырған үлгіде патшадан бөлек  «ханшайым» мен «ханзада» деген тағы 2 тас бар. Егер ойын барысында қарсылас тас патшаны алып тастаған жағдайда, «билік» баласының, яғни ханзаданың қолына көшіп, ойын жалғасады, – деді Александр Кочернин.   


Ойлап тапқан шахмат үлгісімен бірнеше елде болып қайтқан шахматшы өзге ел мамандары оң бағаларын бергенін айтып, алдағы уақытта бұл үлгіні әлі де дамыта түсетіндігін жеткізді.