13 қаң, 2020 сағат 15:17

Роман Григорчук «Астананың» бас бапкері қызметінен кетті

Украиналық футбол маманы Роман Григорчук елордалық «Астана» командасының бас бапкері қызметінен кетті, деп хабарлайды "Ұлт ақпарат" клубтың сайтына сілтеме жасап.

Роман Григорчук 2018-2019 жылдарда аздаған үзіліспен «Астанаға» басшылық етті. Былтыр оның басшылығымен команда Қазақстан Премьер-лигасында чемпион атанып, Еуропа лигасы топтық кезеңінде сынға түсті.

Р. Григорчук футболшылық өмірінде 1988-2000 жылдарда Украина, Австрия, Польша, Ресей, Латвия елдерінде ойын көрсеткен. Ал өзінің бапкерлік қызметінде ол Латвияның «Динабург», «Вентспилс», Украинаның «Металлург» (Запорожье), «Черноморец» (Одесса), Әзербайжанның «Габала» командаларына жетекшілік жасады.

Сондай-ақ, клубта бас бапкердің көмекшілері қызметін атқарған Михаил Савка, Анатолий Коротя және қақпашылар бапкері Андрей Глущенко да «Астанадан» кетті.