14 мау, 2018 сағат 06:51

Ресми: Головкин мен "Канело" екінші рет жекпе-жек өткізетін күн анықталды

WBC, WBA (Super) және IBO тұжырымдары бойынша орта салмақта әлем чемпионы қазақстандық Геннадий Головкин мен мексикалық Сауль "Канело" Альварес екінші жекпе-жегі жайлы келісімге келді, - деп хабарлайды Vesti.kz.

Альварестің мүддесін қорғайтын промоутер Оскар Де Ла Хойяның айтуынша, кездесу 15 қыркүйекте өтеді. Бұл күн - Мексиканың Тәуелсіздік күнінің уик-энді. 

"Кездесудің 15 қыркүйекте өтетінін аса қуанышпен жария етемін, #CaneloGGG2", - деп жазды Оскар де Ла Хойя  Twitter желісінде. 

Айта кетейік, Головкин мен Альварестің қорытынды келіссөздері ресми жарияланымға бір жарым сағат қалғанда өткен. Бастапқыда Оскар де Ла Хойя ESPN басылымына берген сұхбатында "екінші кездесу өтпейді, бұл 100 пайыз" деп мәлімдеген. Алайда бес минут өткенде тараптар қайта талқылауға көшкен.

Ал одан бір тәулік бұрын мексикалық Сауль "Канело" Альварестің ісін жүргізетін Golden Boy Promotions промоутерлік компаниясының президенті Эрик Гомес қазақстандық Геннадий Головкинге ультиматум қойған. Гоместің сөзінше, олар Головкинге қыркүйекте болуы мүмкін қарымтаның кірісін бөлісу туралы соңғы ұсыныстарын айтқан. Ол шарт бойынша табыс Альварестің пайдасына 57,5-те 42,5 болып бөлінеді.

Еске салайық, Головкин мен "Канело" арасындағы алғашқы жекпе-жек былтыр 16 қыркүйекте T-Mobile арнеасында өтіп, төрешілер шешімі бойынша тең аяқталған. Ол кезде қазақстандық түскен табыстың 30 пайызын ғана алған. 

Дегенмен Головкин мен «Канело» арасындағы екінші жекпе-жектің қаржылық мәліметтері жарияланбай отыр. Бірақ боксшылар бірінші айқасқа қарағанда әлдеқайда көп табыс таба алады.

«Енді бокстағы ең үлкен жекпе-жек болатын реванш өтеді. Головкин мен Альварес былтыр қыркүйекте T-Mobile аренада кездесіп, әсіресе Головкин үшін даулы нәтижемен аяқталған еді. Биылғы реванш та сол жерде өтпек. Сол жекпе-жекті көру үшін 1,3 миллион  ақылы сатып алу жасалды және билеттердің саудасынан 27 миллион доллар пайда түсті. Бұл - бокс тарихындағы үшінші көрсеткіш. Адамдардың көпшілігі реванштық айқас осы екі цифрадан асып түсіп, Головкин 40 миллионнан астам доллар табыс табатынын айтуда», - деп жазады espn.com сайты