07 ақп, 2020 сағат 12:27

Президент әлеуметтік кәсіпкерлерді белсенді болуға шақырды – Бақытжан Құдияров

Мемлекет басшысы Қасым-Жомарт Тоқаев әлеуметтік кәсіпкерлікті қолдауға уәде беріп отыр. Президентпен кездесуден кейін кәсіпкер Бақытжан Құдияров осылай деп пікір білдірді, деп хабарлайды ҚазАқпарат.

«Президенттің әлеуметтік кәсіпкерлермен кездесуі бұрыннан жоспарланған. Мұндағы мақсат - Мемлекет басшысын біздің жетістіктеріміз, сондай-ақ жұмысымыздағы қиындықтар туралы хабардар ету. Біздің жобаларымыздың басты мақсаты - мүмкіндігі шектеулі жандарды жұмыспен қамтып, оларды әлеуметке бейімдеу. Президентке біздің жұмысымыз ұнағандай сезілді. Яғни, мемлекеттің бұл нарықта жалғыз ойыншы емес екені, бизнесмендердің әлеуметтік кәсіпкерлерге айналуға дайын екені белгілі болды. Қасым-Жомарт Тоқаев мемлекет әлеуметтік кәсіпкерлікті қолдайтынына сендіріп, бұл үрдіс мүгедектердің өмір сүру сапасын жақсарта түсетінін айтты. Осыған байланысты Мемлекет басшысы бізді белсенді болуға, өз тәжірибемізді БАҚ-та бөлісуге және біздің жұмысымыз туралы бейнероликтер түсіруге шақырды. Біз күзде бизнесмендерді ынталандыру үшін әлеуметтік кәсіпкерлік бойынша үлкен форум өткізуге келістік. Әлеуметтік кәсіпкерлер неғұрлым көп болса, мүмкіндігі шектеулі адамдардың мүмкіндігі жоғарлайды», - деді Бақытжан Құдияров.

Кәсіпкер мүмкіндігі шектеулі жандар арасында тәуелділік психологиясының төмендеп бара жатқанын атап өтті. Сондай-ақ, әлеуметтік кәсіпкерлік мұндай тұлғалардың құқықтық қабілетін арттыруға ықпал етеді.

Атап айтқанда, Бақытжан Құдияров денсаулығында ақауы бар адамдарды біріктіруге бағытталған әлеуметтік кәсіпорын - екі дәмхана ашқан. Осы екі кафеде барлығы 27 адам жұмыс істейді. Кафелердің біріне Алматы қаласының Мемлекеттік активтер басқармасы үй-жай бөлсе, екіншісіне «Трафигура Фондэйшн» қоры қаржылай көмек көрсетеді.

Бақытжан Құдияровтың айтуынша, әлеуметтік кәсіпкерлердің өзекті мәселелері - үй-жайларды жалға беру және өнімді өткізу. Мемлекет басшысымен кездесу барысында кәсіпкерлер аталған мәселелер бойынша көмек сұрап өтініш білдірген. Өз кезегінде Президент бұл өтінішті қарауға уәде беріп отыр.