30 мам, 2019 сағат 09:41

Пікірсайыста қазақ тілі шынайы саяси тілге айналды

Бұл пікірсайыстың басқа пікірсайыстан жөні бөлек.

Еліміздің сайлау туралы заңына сәйкес, сайлауалды пікірсайыс өткізу міндетті емес. Дегенмен, еліміздің саяси менеджменті осынау пікірсайысты күн тәртібіне енгізіп, белгілі бір дәрежеде өткізді. Осы қадам, биліктің елімізде демократия, саяси процесстерді либерализация жасауға мүдделі екендігін көрсетсе керек.

Сондықтан, бұл дискуссия - еліміздің саяси мәдениетін жаңа сапалы белеске шығарудың алғышарты.

Менің бірінші түйгенім, қазақ тілі формальды мемлекеттік тіл емес, шынайы саяси тілге айналып отыр. Яғни, ана тіліміз өзінің әсемдігі, әуендігі, ырғағы, терең түп тамыры арқасында еліміздің барша халқының жүрегінен нақты және мәңгіге орын тапты.

Бұл үлкен жеңіс!

Ал пікірсайыстың өзіне келетін болсақ, еліміздің жалпы күн тәртібі әлеуметтік өрлеу, рухани кемелдену, экономикалық өсім екендігін көрсетті. Үміткерлер ауыл мәселесіне жіті мән бере отырып, ауылдың тыныс-тіршілігі, ауылды дамыту, оның инфрақұрылымын жетілдіруге көп мән берді. Өте дұрыс. Ауыл мен қазақ ажырамас ұғым, ауыл дамыса, ел өркендейді. 

Сонымен бірге, демократия, қоғамдық процессерді әртараптандыру, мемлекет пен қоғам арасындағы қарым-қатынастың тепе-теңдігін сақтау мәселелері өте өзекті болып, ушығып тұрғандығы анық байқалады.

Үміткерлер де, билік те осы мәселені ескерсе, саяси жүйе эволюциялық жолмен дамуына барлық мүмкіндік бар.

Өткен пікірсайысты еліміздің саяси жүйесін жетілдіруге жасалған нақты қадам деп айта аламыз. Мемлекеттің саяси менеджменті қоғамдық пульсті анық басып, демократия стандарттарын бірте-бірте енгізуге құлқы бар екендігін көрсетті.

Әрине, пікірсайыстың "әттеген-айлары да" жоқ емес, қоғамның бір бөлігі үміткерлердің өздері дебатқа келуі керек, дебаттың форматы бөлек болуы керек деген ой айтуда. Жетілуге шек жоқ. "Көш жүре түзеледі" бұның барлығы болашақта ескеріледі деп ойлаймыз. Сайлау науқаны әлі аяқталған жоқ. Егер де, үміткерлердің біразы өзінің ойын аудиторияға қосымша жеткіземін десе, оларға қой дейтін ешкім болмайтындығы анық...

Ерлан Саировтың фейсбуктағы жазбасынан