01 сәу, 2020 сағат 17:03

Қазақстандық фермерлер дизель отынын 15% арзанға сатып алатын болды

Қазақстандық фермерлер дизель отынын ағымдағы бөлшек сауда бағасынан 15% арзанырақ сатып алатын болды, деп хабарлайды "Ұлт ақпарат" Энергетика министрлігіне сілтеме жасап.

Ауыл шаруашылығы операторларына жеткізу, сақтау және үстеме баға есебімен дизель отынының бағасы - 165 теңге.

Бұған дейін Энергетика министрлігі Ауыл шаруашылығы министрлігімен бірлесіп «Егін жұмыстарына дизель отынын жеткізуге арналған МӨЗ-ге аудандарды бөлу кестесін» бекіткен еді. Оның шеңберінде ауыл шаруашылығы тауарын өндірушілерге қажеттілік 390 мың тонна деп бекітілді.

Бұрын ұсынылған баға зауытта бір тоннасы - 194 мың теңге (литрі - 161 теңге) еді.

Президент Қасым-Жомарт Тоқаевтың тапсырмасын орындау шеңберінде ауыл шаруашылығы тауарын өндірушілерге дизель отынының бір тоннасы - зауытта 174 мың теңге немесе литрі - 144 теңге деңгейінде белгіленеді.

Жеткізуді, сақтауды және операторлардың шекараларын ескере отырып, бір литр - 165 теңге. Бұл қазіргі бағадан 15% арзан (жанармай стансасында дизель отыны литрінің орташа бағасы - 193 теңге).