14 қаң, 2020 сағат 20:47

Қарағандыда соғыс ардагерлеріне 1 млн теңгеден көмек берілмек

Қарағандыда Екінші дүниежүзілік соғыстың ардагерлеріне 1 млн теңгеден бір реттік көмек берілмек, деп хабарлайды "Ұлт ақпарат".

«Биыл Екінші дүниежүзілік соғыстың аяқталғанына 75 жыл толады. Осыған орай өтетін шаралар қазір жан-жақты пысықталуда. Сонымен қатар соғыс ардагерлеріне 1 миллион теңге көлемінде бір жолғы көмек қаражат беріледі», - деді Қарағанды қаласы ішкі саясат бөлімінің басшысы Дархан Жиенбаев қала әкімдігінің аппарат кеңесінде.

Сонымен қатар, ардагерлерге қамқорлық көрсету мақсатында «Ардағым Ардагерім» акциясы жалғасуда. Жастар арасынан волонтерлер тазалау немесе жөндеу жұмыстарын жүргізу, тұрмыстық мәселелерді шешуге көмектесу үшін қарт адамдардың үйлеріне барады.

Ақпан айында Совет әскерлерінің Ауғанстаннан шығарылғанына 31 жыл толады. Бөлім басшысының айтуынша, жауынгер-интернационалистерге 100 мың теңгеден материалдық көмек беріледі.

Бүгінгі таңда Қарағандыда Екінші дүниежүзілік соғысқа қатысқан 38 ардагер тұрады. Сондай-ақ, 698 тұрғын Ауғанстандағы соғысқа қатысқан.