ҚР Қорғаныс министрі Нұрлан Ермекбаев Арыстағы жарылыс болған әскери қалашық туралы айтып берді, деп хабарлайды "Ұлт ақпарат".
«Арыстағы әскери қалашықтар мен арсенал әскерилердің жіті бақылауында. Олардың бір бөлігі арнайы қорғалған бункерде сақтаулы, бір бөлігі тиісті қорғаныспен қамтылған. Сондықтан, олардың қауіпсіздігіне кепілдік беріледі (...) Бұл арсенал барлық күзет құралдарымен, дабыл қаққышпен жабдықталған. Қоймалардың айналасы топырақпен көмілген. Сондықтан, аталған оқиға себептерін арнайы құрылған тергеу тобы анықтайтын болады. Мұнда ешқандай радиактивті оқ-дәрі мен снарядтар сақталған жоқ. Ешқандай радиация қаупі жоқ», - деді Нұрлан Ермекбаев Арыс қаласында тікелей эфирде өткен брифингте.
Бұған дейін Қорғаныс министрі Арыс тұрғындарына жедел штабтың рұқсатынсыз баспаналарына қайтып келмеуді өтінді. Себебі Арыстың көшелерінде жарылмай қалған оқ-дәрілер болуы мүмкін.
Оның сөзінше, барлық үйлер мен кварталдар полиция мен қарулы күштердің жіті бақылауында. Сондықтан ешқандай тонаушылық пен ұрлық-қарлық болмайды.
2025 рет оқылды
