06 жел, 2018 сағат 06:54

Электрондық сауданың мүмкіндігі арта түспек


«Қазпошта» мен «Одноклассники» басшылығы қол қойған меморандум бұл саланы тағы да ілгерілете түспек.

Мемлекет басшысының тікелей бастамасымен қолға алынған «Цифрлық Қазақстан» бағдарламасының бір бағыты – электрондық сауда. Ал бұл өз кезегінде еліміздің күллі экономикасының қозғаушы күшіне айнала алады. Осы негізде Үкімет қаулысымен іргелі реформалар басталып, олардың жалғасын тауып жатқанына да куәміз. Айталық, 2017 жылы қазақстандық e-commerce нарығының көлемі 106,9 млрд теңгені немесе бөлшек сауда айналымының жалпы көлемінің 1,2 пайызын құрады, бұл 2016 жылғы көрсеткіштен 36,2 пайызға жоғары.

"Қазпошта" АҚ мәліметінше, электрондық сауда нарығының көлемі 2018 жылдың 5 айында 101 млрд теңгені немесе бөлшек сауда айналымының жалпы көлемінің 2,9 пайызын құрады (3,53 трлн теңге). Тағы да айта кетерлігі, елімізде жыл басынан бері 110 жаңа электрондық сауда субъектісі тіркелген. Нарықта 1658 интернет-дүкен жұмыс істейді, сатып алушылар саны 5 пайызға өсті. Салада 71,6 мың қызметкер жұмысқа орналастырылды.

Ал жақында Қытай тауарларының маркетплейсі «Одноклассники» әлеуметтік желісі арқылы Қазақстан нарығына шықты. Енді аталған әлеуметтік желінің еліміздегі 2,5 млн пайдаланушысы интернет-дүкеннің 30 млн-нан астам тауарын таңдап, тапсырыстың төлемін теңгемен жасай алады. Ал тауарды қысқа мерзімде жеткізіп беру қызметін «Қазпошта» АҚ қазіргі заманғы технологияларының арқасында мойнына алады.

ОК интернет-дүкені әр түрлі санаттағы тауарды таңдауға, сатып алуға және пошта арқылы жеткізуді ресімдеуге мүмкіндік береді. E-commerce платформасының негізгі ерекшелігі – пайдаланушы контентінің интеграциясы (UGC): сатып алушылар тауарларды бейне және фото шолулар арқылы қарап, бағалай алады. Сондай-ақ тауарлар туралы ақпаратты достарымен әлеуметтік желілерге бөлісіп, оларды жақындарына ұсына алады.

«Одноклассники» – өз платформасында толыққанды маркетплейсті іске қосқан Ресейдегі алғашқы әлеуметтік желі. Ондағы интернет-дүкен flash sales форматында жұмыс істейді, яғни ең танымал тауарларды жылдам сату, десктопты және мобильді нұсқаны қоса алғанда, барлық платформаларда, ОК мобильді қосымшаларында қол жетімді. Маркетингте тауарлар санаты бойынша іздеу және кеңейтілген навигация бар.

Барлық сатып алулар толық қорғалған. Төлем банк картасымен ОК аккаунтына байланысты жасалады, егер тауар келмесе немесе оның сапасы сатып алушыға ұнамаса, әлеуметтік желі ақшаны қайтарады. Жеткізу бүкіл Қазақстан бойынша тегін және «Қазпошта» арқылы жүзеге асырылады. Сонымен қатар, тапсырыстан кейін үш сағат ішінде сатып алушы оны жоя алады. Интернет-дүкен сатып алуға, қайтаруға, жеткізуге, тауардың сапасына байланысты мәселелерді шешуге көмектеседі.

Антон Федчин, «Одноклассники» әлеуметтік желісінің жетекшісі:

– Біздің Қазақстан нарығына шығуымыз және «Қазпоштамен» интеграция – әлеуметтік желіні дамыту жолындағы маңызды жұмыс. «Одноклассники» – Ресейде ғана емес, шет елдерде де ірі әлеуметтік желілердің бірі. Қазақстан тұрғындары әлеуметтік желі платформасында сатып алудың барлық артықшылықтарын бірінші болып бағалай алады. Мәселен, тауарды таңдаудан бастап, тапсырыс орналастырғанға дейін және ОК шегінен шықпай-ақ төлем жасай алады. Дүкен біздің әлеуметтік тұғырнамамызға толыққанды интеграцияланатын болады. Тауарларды сатып алудан бөлек, пайдаланушылар контенттің жаңа түрлерін және шолуларды қарап, оларды өздері құрып, тауарлар туралы пікірлермен бөлісе алады.