11 қаң, 2019 сағат 12:04

Дәрі-дәрмек бағасы барлық өңірде бірдей болады - министрлік

Бүгін PrimeMinister.kz ресми ресурсының алаңында ҚР Денсаулық сақтау министрлігінің Фармация комитетінің төрайымы Людмила Бюрабекова халықты дәрі-дәрмекпен қамтамасыз ету саласындағы жаңалықтар туралы айтып берді. Сондай-ақ, Президент Жолдауын іске асыру аясында дәрі-дәрмектердің бағаларын төмендету шаралары туралы сөз қозғалды, деп хабарлайды "Ұлт ақпарат".

Л. Бюрабекованың айтуынша, «ҚР кейбір заңнамалық актілеріне дәрілік заттар мен медициналық бұйымдардың айналысы мәселелері бойынша өзгерістер мен толықтырулар енгізу туралы» Заң Президенттің «Қазақстанның үшінші жаңғыруы: жаһандық бәсекеге қабілеттілік» Қазақстан халқына Жолдауына сәйкес әәзірленген және барлық дәрі-дәрмектердің бағасын реттеуге бағытталған.

«Заң жобасы жарияланғаннан кейін үш ай уақыт өткен соң күшіне енген кезден бастап шекті көтерме және шекті бөлшек сатылым бағаларын анықтау рәсімі басталады, көтерме дистрибьюторларға және бөлшек саудада осы анықталған шекті бағалардан асырып дәрі-дәрмектерді сатуға тыйым салынады», — деді Людмила Бюрабекова.   

Дәрі-дәрмектердің бағаларын мемлекеттік реттеуді енгізу өңірге қарамастан, көтерме және бөлшек сегментте дәрі-дәрмектердің бірыңғай бағасын қалыптастыру механизмін қамтамасыз етуді көздейді. Сондай-ақ, халық үшін дәрі-дәрмектердің экономикалық қолжетімділігін арттырып, фармацевтикалық нарық қатысушыларының, яғни дәрі-дәрмектерді өндірушілер, көтерме және бөлшек сауда ұйымдарының жауапкершілігін арттыруға бағытталған.

Фармация комитетінің төрайымы дәрі-дәрмектер бағаларын қалыптастырудағы жоспарлы өзгерістер бағаны реттеудің 4 деңгейін: өндіруші, көтерме сауда, бөлшек сауда мен міндетті әлеуметтік медициналық сақтандыру жүйесі және тегін медициналық көмектің кепілдік берілген көлемі аясындағы сатып алу деңгейлерін қамтитынын атап өтті.

«Бағаларды реттеудің төрт деңгейі өндірушінің бағаны белгілеуіне тікелей қатысты, дегенмен олар тек Қазақстан Республикасында тіркелген дәрі-дәрмектерге ғана қатысты. Бұдан әрі үстеме бағаны ескере отырып шекті көтерме және шекті бөлшек баға бекітіледі. Сонымен қатар, ережелер тегін медициналық көмектің кепілдік берілген көлемі аясында және міндетті әлеуметтік медициналық сақтандыру жүйесінде дәрілік заттарды сатып алуға бағаларды белгілеуді реттейтін болады», — деді Л. Бюрабекова.

Бұған қоса, қымбат тұратын дәрі-дәрмектердің бағалары да реттеледі.

Л. Бюрабекова бағаларды реттеу дәрі-дәрмектердің сапасына әсер етпейтініне назар аударды.

«Баға мен сапа – дәрі-дәрмекпен қамтамасыз етуде үнемі ескерілетін екі критерий. Бізде сапаға сараптамалық ұйым – Дәрі-дәрмектерді сараптаудың ұлттық орталығы жауапты. Тіркеу жүргізіліп жатқан кезде компания дәрінің сапасын растайтын құжаттар пакетін ұсынады. Егер дәрі-дәрмек Қазақстан Республикасының аумағында тіркелген болса, онда оның қауіпсіздігі мен сапасы дәлелденген. Сәйкесінше, бағаларды реттеу дәрілердің сапасына ешқалай да әсер етпейді. Өзгерістер шектеулілік түрінде байқалады, біз бұйрықпен бекітетін айырма мен үстеме бағаны жұртшылықпен және қауымдастықтармен белсенді түрде талқыладық. Аталған бағаға ешкім қарсы емес секілді. Қандай да бір дәрі-дәрмек нарықтан шығып қалмайды деп ойлаймыз», — деді Фармация комитетінің төрайымы.  

Айта кетерлік жайт, еліміздің барлық өңірлерінде дәрі-дәрмектердің бағалары бірдей болмақ.

«Дәріханалардың ауылдық немесе қалалық екеніне қарамастан, бағалар бұйрықпен бекітіліп, ҚР барлық аумағында бірдей бағамен сатылатын болады», — деді Л. Бюрабекова.