11 қаз, 2018 сағат 16:25

Данияр Елеусіновтің келесі қарсыласы анықталды

Қазақстандық кәсіпқой боксшы, Рио-де-Жанейро Олимпиадасының чемпионы Данияр Елеусінов (3-0, 1КО) келесі жекпе-жегін америкалық Мэтт Догертиге (8-5-1, 4КО) қарсы өткізеді. Бұл туралы ВКонтакте әлеуметтік желісінде «Қазақстан кәсіпқой боксы» аккаунтында жазылды, деп хабарлайды ҚазАқпарат.

Елеусіновтің алдағы кездесуі 20 қазан күні Американың Бостон қаласында өтеді. Боксшының менеджері Зия Әлиевтің айтуынша, оған 30 жастағы америкалық боксшы, «Дәуіт» аталған Мэтт Догерти қарсылас болады. Кештің басты айқасы Билли Джо Сондерс пен Деметриус Эндрейд арасында өтеді. Алайда, қыркүйек айының соңында допинг-сынамалардың бірінде Сондерстен оксилофрин табылған еді. Іс бойынша отырыс Массачусетс штатының Атлетика комиссиясында өтуі тиіс.

Еске салайық, Данияр Елеусінов биылғы 4 тамызда өткен жекпе-жекте венгриялық Габор Горбичті ұпай саны бойынша айқын басымдықпен жеңген болатын. Бұл жеңістен кейін қазақстандық боксшының BoxRec.com танымал сайтындағы рейтингі бірден 75 сатыға жоғарылады.