ҚР Парламенті Сенатындағы Үкімет сағатында Білім және ғылым министрінің орынбасары Эльмира Суханбердиева еліміздегі апатты және үш ауысымды мектептердің мәселесі қалай шешілетінін мәлім етті, деп хабарлайды Baq.kz агенттігі.
Вице-министр білім саласындағы өзекті проблемалардың бірі – апатты және үш ауысымды мектептер екенін мойындады.
«Апатты мектептердің қатарында пайдалану мерзімі аяқталып келе жатқан білім ордалары қосылуда. Еліміздегі 82% мектеп 1991 жылға дейін, ал 34% мектеп 1971 жылға дейін тұрғызылған. Үш ауысымды мектептердің проблемасы экономикалық, демографиялық және миграциялық процестерге байланысты болып отыр», - деді ол.
Осы орайда Эльмира Суханбердиева аталған мәселені шешу үшін елімізде жыл сайын 100-ден астам мектеп салынатын жеткізді.
«Биыл 53 млрд теңгеге 108 мектеп салынып жатыр. 3 жылдық бюджетте 97 млрд теңгеге 73 жаңа мектептің құрылысы қолдау тапты. Оның ішінде 50 млрд теңгеге 34 мектеп бар. Үш ауысымды мектеп мәселесін шешу үшін 33 мектеп салынуда. Тағы 30 мектеп алдағы 3 жылда салынады. Оның 19-ы бөлінген 50 млрд теңгеге салынады. Олардың құрылысы республикалық бюджет есебінен қаржыландырылады 41 мектепті жергілікті органдар тұрғызады. Ал 9 мектепті жеке-меншік инвесторлардың көмегімен саламыз деп жоспарладық», - деді министрдің орынбасары.
Суханбердиеваның айтуынша, апатты мектептердің орнына 13 объекті салынады.
«Оның алтауы жақын жылдары, қалған бесеуі республикалық бюджеттен бөлінетін 50 млрд теңгеге салынады. 12 мектепті жерігілікті органдар тұрғызады. Осылайша, аталған мәселе толығымен шешіледі», - деп түйіндеді сөзін вице-министр.
Естеріңізде болса, вице-министр мұғалім мәртебесі туралы заңды дайындауға кірісіп кеткендіктерін айтқан болатын. Сонымен қатар, биылғы жылы қанша ұстаздың жалақысы көтерілгені туралы да айтқан еді. Ал елімізде қанша ұстаздың қанша пәнді ағылшын тілінде оқытып жүргенін де вице-министр тілге тиек еткен болатын. Сондай-ақ, вице-министр алдағы жылы 1-сыныптан бастап имформатика пәні оқытылатынын айтты. Бұдан бөлек Эльмира Суханбердиева мектепте "Өлкетану" курсы оқытылатынын жеткізді.
1695 рет оқылды
