25 мау, 2019 сағат 12:46

Әскери қызметшілер Арысты минадан тазалап жатыр

ҚР Қорғаныс министрлігінің әскери-инженерлік қызметшілері Арыс қаласын минадан тазалау жұмыстарын жүргізіп жатыр. Бұл туралы ведомствоның баспасөз қызметі хабарлады.

«Қазіргі уақытта оқиға орнында сапында жарылыс қаупі бар заттармен жұмыс істеуде тәжірибе әскери қызметшілерден жасақталған 9 минасыздандыру тобы жұмыс істеп жатыр. Аталған топтар аумақта жарылмай қалған оқ-дәрілерден тазарту бойынша кешенді шаралар жүзеге асырады. Оқ-дәрілерден тазарту жұмысы елді мекендерге таяу орналасқан қоймалар мен басқа да сақтау орындарындағы жарылу қаупі бар заттардан барынша тазарту мақсатында ұйымдастырылған», - деп атап өтеді министрліктен.

Ведомство мәліметінше, ең алдымен темір жолдың бойын, қару-жарақ қоймасына іргелес Арыс қаласындағы тұрғын үйлер мен ғимараттардың маңын қауіпті заттардан тазарту жүргізіледі. Бұл тұрғындар үйлеріне оралған кезде олардың қауіпсіздігін қамтамасыз ету үшін жасалып жатыр. Сонымен қатар, ұшқышсыз ұшатын аппараттардың көмегімен Арыс қаласының төңірегі мен арсеналдың техникалық аумағы барлануда.

«Әскери полиция бөлімшелері тәуліктік шолғындауды ұйымдастырды. Шамамен 700 әскери қызметші қаланы қоршауға алған. Сонымен қатар, оқиға орнында 1 200 адамға арналған шатыр тігілген», - делінген таратылған ақпаратта.