21 там, 2018 сағат 10:00

АҚШ-тың Мемхатшысы Құрбан Айт мерекесімен құттықтады (Видео)

Америка Құрама Штаттарының Мемлекеттік хатшысы Майк Помпео мұсылмандарды Құрбан айт мерекесімен құттықтады, деп хабарлайды "Ұлт ақпарат".

«Бүкіл мұсылмандар қажылықтың аяқталуында атап өтетін Құрбан айт мерекесі қабыл болсын! Құрбан айт мерекесі - әлем мұсылмандары өздерінің отбасыларымен және достарымен бірлесе, бейбітшілік пен жанашырлық рухында дұға ететін уақыты. Осы кезеңде мұсылман қауымдастығының мүшелері ниет етіп, қайырымдылық жасайды, қиыншылықтарға тап болғандарға жомарттылық пен көмек жасаудың маңыздылығын көрсете біледі. Мейірімділіктің бұл әрекеттері бәріміз үшін үлгі бола алады. Мемлекеттік департамент атынан мерекені тойлайтын дүние жүзіндегі достарымызға, серіктестерімізге және одақтастарымызға тағы да шын жүректен ұлық мереке мүбарак болсын!», - делінген Қазақстандағы АҚШ елшілігінің ресми парақшасында.

Айта кетейік, бүгін - Ораза айттан кейін 70 күннен соң басталып, 3 күнге созылатын Құрбан айт мерекесінің алғашқы күні.

Құрбан айт - әлемдегі мұсылман қауымның ең қасиетті мерекесі. Мерекенің үш күнінде мұсылмандар құрбан шалады.