Әл-Фараби атындағы ҚазҰУ-да «Ең үздік студенттік топ – 2019» байқауының ақтық сайысы мәресіне жетті. Гранд финалдық инновациялық жобаларды қорғау кезеңінде әр топ Елбасымыздың «Рухани жаңғыру» бағдарламасы және «2019 жыл – Жастар жылының» аясында жобаларын ұсынды. 2012 жылдан бері бастау алған жоба студенттердің белсенді азаматтық ұстанымын қалыптастыру, үздік студенттер тобын шығару және ынталандандыру мақсатында жүргізіліп келеді.
Осы жылы 6 факультеттен ең үздік 6 топ гранд финалдық кезеңге қатысты. Үш айға созылған дода студенттердің уақыттарын қызықты әрі пайдалы іске жұмсауына септігін тигізді. Студенттердің жалпы оқу үлгерімі, ғылыми, мәдени және қоғамдық шаралардағы белсенділігі, өзін-өзі басқарудағы ұйымдастырушылық қабілеттері сыналатын дода бұл жылы да дәстүрлі түрде «Сұңқар» студенттер мен магистранттар кәсіподағының ұйымдастыруымен жоғары деңгейде өткізілді. Конкурстың төрт деңгейінде: студенттік топтар таныстырылды, «Талайға арман болған, талайды қанат қақтырған ҚазҰУ» атауындағы бейнероликтерімен сыналды және топтар интеллектуалдық қабілеттіліктерін көрсетті, инновациялық жобаларын қорғады. Сонымен қатар, «Айналаңды нұрландыр» және «Алма-Қала» акциялары төңірегінде ҚазҰУ қалашығында көшеттер отырғызуға атсалысты. Ақтық сында Физика-техникалық факультеті – «Face камера», Ақпараттық технологиялар факультеті – «Smart жатақхана», Шығыстану факультеті – «Equality» зағип жандарға тіл үйрету курсы, Химия және химиялық технология факультеті – «Табиғи газ метаннан каталитикалық жолмен таза сутегіні алу», Биология және биотехнология факультеті – «Биогумус», Журналистика факультеті – «Diploma project» сынды жобалар ұсынды.
Дәстүрге айналған «Ең үздік студенттік топ – 2019» жобасының нәтижесінде жүлделі үшінші орын алған Физика-техникалық факультеті, «Жылу энергетикасы - 227» тобы Шарын шатқалына жолдама алса, екінші орынды иеленген Шығыстану факультетінің «Шетел филологиясы: корей тілі» мамандығының студенттеріне «Ыстықкөл» спорттық-сауықтыру орталығына жолдама бұйырды. Бірінші орынға ие болған Химия және химиялық технология факультетінің «Химия-201» тобы әл-Фараби атындағы ҚазҰУ-дың үздік тобы атанып, Нұр-Сұлтан қаласына жолдама алды. Сонымен қатар, «Ең үздік студенттік топ» жобасының «Ең үздік студент» номинациясына ие болған Биология және биотехнология факультеті, «Биотехнология-17» тобының студенті Ембергенов Нуратдин «Сұңқар» студенттер мен магистранттар кәсіподағының «85 жылдыққа 85 қайырымды іс» жобасы бойынша «Үммет жастары» қоғамдық-қайырымдылық қорының демеушілігімен ноутбукке ие болса, «Ең үздік староста» номинациясына ие болған Журналистика факультеті, «PR-101» тобының студенті Гүлбану Ерғазықызы Дубай қаласына жолдама алды.
Қазақ Ұлттық Университеті ректоры Ғалым Мұтанұлының қолдауымен өткен жобаның финалдық кезеңі Алматы қаласы белсенді жастары мен ҚазҰУ оқытушы-профессорлар құрамының көзқарасы бойынша жоғары деңгейде өткендігін дәлелдей түсті. Жарқын жоба алдағы ағымда студент жастардың тың идеялары нәтижесінде жандана түспек.
Нұрсәуле Идаят,
ҚазҰУ, Биология және биотехнология факультетінің 3 курс студенті
2407 рет оқылды
_140_110.webp)
_80_80.webp)
